بدايةً شاكر هذا الإهتمام بمتابعة يوميات ” واحد حب يعمل فيلم ” ، لدرجة أن هناك رسالتين وصلتا لي من الأخ العزيز جداً ” كريم \ الحُسام ” من ” هولندا ” ، والأخت العزيزة ” منة الله ” يطلبان فيها ضرورة استكمال اليوميات ، وأن أصنع لنفسي مدونة خاصة بي ، بالطبع أشكر أيضاً أخي ” م. عبد العزيز عادل ” و الصديقة العزيزة ” إسراء ” – التي شرفتني لأول مرة بالرد – وكذلك الصديقة العزيزة ” ميمو ” – التي اكتشفت أنها تتابعني من بعيد لبعيد كما نقول !– وأيضاً الأخت العزيزة ” توتا ” – والتي أتمنى أن تعاود النشر مُجدداً في مدونتها – وكل الأعزاء المُهتمين بالسؤال ..

في الحقيقة سبب قيام هذه المدونة – كما ذكرت سابقاً – ” محمد النقيب ” .. أنا لم أكن أرغب في نشر هذه اليوميات بتاتاً إلا على شكل كتاب مطبوع ، لكن الحاح ” النقيب” – الذي أشكره عليه – دفعني للنشر في المدونة – والتي قال أنه صنعها من أجلي – لن أخوض في الحديث عن هذا الموضوع ، لكني ها قد عدت – والشكر الخاص جداً للمهندسة والصديقة العزيزة ” هالة ” من الكويت – لأنها أصرت ألا تتوقف هذه اليوميات وأن تستمر ، لتصنع لي مدونة جديدة – ها هي بين أيديكم الآن – وفي الحقيقة فإنني إن استمر في نشر هذه اليوميات ، فذلك لإنني اكتشفت أن هناك من يشعر – وهناك الكثيرين الذين باحوا لي عبر المسنجر أن هناك أشياء مُرتبطة بهم مذكورة في اليوميات ! – أنها عنه هو \ عنها هي لا عني ، لذا رأيت ضرورة استمرار النشر ، وستصبح الأخت العزيزة ” هالة ” – وهي مشكورة مُقدماً على تعبها معي ! – هي المسئولة عن المدونة معي إن شاء الله ، لأنني اكتشفت إنه إن لم أُدفع – كما دفعتموني بردودكم ورسائلكم – بواسطة شخص عزيز – مثل العزيزة ” هالة ” – فربما أتوقف عن استمرار نشري لليوميات .. تعلمون ضرورة وجود من يُصدع رأسك دائماً بالسؤال :

أين حلقة الجمعة ؟ .. لِمَ تأخرت ؟ .. يا الله ! .. إلى آخر هذه الأشياء التي لا بُد وأن يكون هناك من هو مسئول عنها ..

فقط سأتابع هذه المدونة ، للرد على من يكتبون ردوداً على الحلقات السابقة من ” واحد حب يعمل فيلم ” ، وهي بالترتيب :

الحلقة الأولى
واحد حب يعمل فيلم
http://oscarization.wordpress.com/2007/03/02/%d9%88%d8%a7%d8%ad%d8%af-%d8%ad%d8%a8-%d9%8a%d8%b9%d9%85%d9%84-%d9%81%d9%8a%d9%84%d9%85/

والحلقة الثانية
وماشية الرحلة
http://oscarization.wordpress.com/2007/03/09/%d9%88-%d9%85%d8%a7%d8%b4%d9%8a%d8%a9-%d8%a7%d9%84%d8%b1%d8%ad%d9%84%d8%a9/

أما الحلقة الثالثة
في الانتظار
http://oscarization.wordpress.com/2007/03/16/%d9%81%d9%8a-%d8%a7%d9%84%d8%a7%d9%86%d8%aa%d8%b8%d8%a7%d8%b1/

هناك تاج وصلني ، وهو ما يُمثل ” برة الكادر “
http://oscarization.wordpress.com/2007/03/21/%d8%a8%d8%b1%d8%a9-%d8%a7%d9%84%d9%83%d8%a7%d8%af%d8%b1/

الحلقة الرابعة
يُرجى إعادة الاتصال في وقت لاحق
http://oscarization.wordpress.com/2007/03/23/%d9%8a%d8%b1%d8%ac%d9%89-%d8%a5%d8%b9%d8%a7%d8%af%d8%a9-%d8%a7%d9%84%d8%a7%d8%aa%d8%b5%d8%a7%d9%84-%d9%81%d9%8a-%d9%88%d9%82%d8%aa-%d9%84%d8%a7%d8%ad%d9%82/

الحلقة الخامسة والأخيرة في هذه المدونة بعنوان

وحلق بعيداً
http://oscarization.wordpress.com/2007/03/29/%d8%ad%d9%84%d9%82-%d8%a8%d8%b9%d9%8a%d8%af%d8%a7%d9%8b/

أما بخصوص الحلقات الجديدة ، فسوف تُنشر تباعاً على مدونتي الجديدة :

http://oscar2008.jeeran.com/

وممنون جداً – للمرة اللي مش عارف كام ؟ – للأخت العزيزة ” هالة ” من الكويت لتصميمها المدونة الجديدة ، وكونها المسئولة – والعبد لله معها ! – عنها ..

فقط أود أن أعتذر لكم عن عدم نشر حلقة الجمعة من هذا الأسبوع ، لنبدأ الأسبوع القادم في نشر الحلقة السادسة ” عايزين تعيدوا الشريط ؟ ” ، والتي مُتأكد أنكم ستصابون بالفالج عند قراءتها .. ( وش شيطان بيطلع لسانه ليكم ! ) ..

هذه الحلقة مُخصصة للرد على ( تاج ) وصلني من الأخ العزيز ” مبرمج حر ” http://mooparmghor.com/blog/?p=154

هل تسعد عندما يمرر لك أحدهم تاجا؟

أكيد طبعاً .. ده معناه إنه مهتم بيا وبمدونتي أكيد

هل مقدار سعادتك أو شعورك أيا كان – عند تمرير التاج لك يختلف حسب المدون الذي يمرر لك التاج؟

لا طبعاً بسعد بأي تاج بيوصلني من أي حد

هل تستمتع عند إجابتك عن أسئلة التاج؟

جداً

هل ترى للتاج أهمية حقيقية ؟

هو حسب التاج نفسه ، يعني في تاجات عادية ، وفي تاجات تحس كده إنها بتلمس روحك ..

هل فكرت في عمل تاج خاص لك من قبل؟

الحقيقة لا ..

هل تفضل قراءة أجوبة التاج عند المدونين الآخرين ؟ أم لا تهتم سوى بالتدوينات الأخرى فقط؟

الحقيقة مش دائماً ببقى مهتم أقرأ أجوبة التاجات اللي فاتت ، بس بهتم أقرأ أجوبة التاج اللي بتوصلني واللي ببعتها ..

عندما ترد على التاج ما الذي تراعيه أكثر؟

بحب أعرف الناس بيا بشكل عميق ، وده هدف مدونتي أصلاً ، إنها عبارة عن يوميات ، فبتعرف الناس عني بشكل أقرب ..

إلى من تحرص على تمرير التاج؟

بحرص إني أمرر التاج لناس أنا بحترمهم جداً ، وبحترم آرائهم ..

هل تحرص على قراءة إجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

أكيد طبعاً ..

هل تلتزم حرفيا بأسئلة التاج ؟

أها ! ..

ما هي نوعية التاجات التي تفضلها ؟

أي نوع ، لإن أي حد بيهتم يديلك تاج ، يبقى بيهتم بيك ..

همرر التاج لكل من :

هالة \ www.hala2006hala.jeeran.com

توتا \ http://ketabatyt.blogspot.com/

مصطفى يحيى \ http://www.7aya.blogspot.com/

أحمد عبد الفتاح \ http://crazyboy-aym.blogspot.com/

ميمو \ http://mahamemo.blogspot.com/

إسراء \ http://theprincess28.blogspot.com/

ميعادنا الجمعة القادمة إن شاء الله ..

تحياتي

محمد عادل \ أوسكار

طبعاً بشكر كل اللي علق هنا ، وأعذروني إني مقدرتش أعلق عليكم واحد واحد ، بس في نفس الوقت حبيت أقلكم إني مش هكمل نشر اليوميات في المدونة ، وده لإن صاحب المدونة ” محمد النقيب ” مش حابب أكمل نشر اليوميات في المدونة .. وهي مدونته في النهاية ، وده حقه طبعاً ، لإنه هو اللي عمل المدونة ، وأنا كنت ضيف فيها ، أتمنى بس مكنتش ضيف ثقيل عليه أو عليكم .. بحب أشكر ” النقيب ” على تعبه معايا ، وإنه خلاني أتواصل معاكم على مدار خمس حلقات ، وكفاية إنه شجعني على نشر اليوميات ، ده طبعاً بجانب ” محمد إبراهيم محروس ” اللي إداني دفعة قوية لتكملة اليوميات أصلاً ..  يعني الشكر كله للإسماعيلية من الآخر .. بشكر ناس كثير اتعرفت عليهم هنا ، وإن شاء الله أنا مش هقطع تعليقاتي ومتابعتي ليكم ، لإنكم بجد تستاهلوا المتابعة ..

تحياتي
محمد عادل \ أوسكار

- …………………………..
- أيوة .. ده كان قرار شخصي ..
- ………………………….
- علاقتي بيهم دلوقتي ؟! .. هممممم ! .. Let Me Guess .. العلاقة تقريباً .. صدقني مش عارف ! .. من ناحيتي .. بص مش عارف بجد ! ..
- …………………………
- شغلي دلوقتي مبسوط فيه .. لكن في مشاكل عندي ، ده غير الدراسة اللي عايز أخلصها .. يعني .. أهي فترة – زي ما قلتلهم – نشوف فيه الموضوع نقدر نستمر فيه ولا لا ..
- …..
- هش ! .. كفاية أسئلة بقى !! ..
- أجبلك حاجة يا ” أ. محمد ” ؟ ..
- ها ! .. أيوة يا ” درش ” .. نسكافيه سكر زيادة من فضلك ..
- أوك .. ” أ. محمد ” حضرتك مش هتقوم تاكل ؟! .. ال Break وقته قرب ينتهي ..
- هقوم حالاً أهو ..

هااااوم ! .. يا الله يا كريم ! .. منمتش من إمبارح .. المكاتب كلها هادية دلوقتي .. بهرش في راسي .. بلعب في شعري .. بدندن على المكتب .. بجد ! .. ههههههه ! .. هو أنا مالي النهاردة ؟! .. يمكن ده عشان منمتش .. موبيلي بيرن .. Tamer El Said.. Calling .. ؟! ..

- السلام عليكم .. إزيك يا ” تامر ” ؟ ..
- أهلاً يا محمد .. تمام .. انت إيه أخبارك ؟ ..
- الحمد لله .. أخبار أخوك إيه دلوقتي بعد العملية ؟ ..
- الحمد لله .. صحته بقت أحسن بعد العملية ..
- طب الحمد لله .. ربنا يقومهلكم بالسلامة ..
- معهلش يا ” محمد ” أنا عارف إني إتأخرت عليك أوي في إني أقولك رأيي في القصة ..
- يا سيدي ولا يهمك .. المهم بس دلوقتي إن ربنا يقوملك أخوك بالسلامة ..
- هو دلوقتي كويس ، ونايم .. قلت أكلمك عشان موضوع القصة ..
- أوك !! ..
- أنا قريت القصة ..
- و ؟ ..
- هي حلوة جداً .. تحفة فعلاً ..
- طب الحمد لله إنها عجبتك ..
- بس مش هقدر أعملها ! ..
- ………………………..
- هي كويسة وكل حاجة .. بس هي مش ال Type بتاعي .. يعني أنا لو هخرج حاجة هخرج حاجة غير دي .. عشان لو أخرجت قصتك هبوظها .. أنا عارف بقلك إيه ..
- ……………………..
- انت معايا ؟ ..
- معاك ! ..
- يعني ….
- خلاص فهمت ! .. على العموم أنا اتشرفت بمعرفتك ، وزي ما قلتلك إحنا أصحاب بشغل أو من غيره .. هكلمك ثاني أكيد قريب عشان في موضوع عايز أعمله عنك ، وأنشره في المجلة ..
- تمام ..

الساعة واحدة الظهر ! .. ال Break إنتهى .. في ناس رجعت تقعد على مكاتبها ، وتكمل شغل ، وفي ناس لسه مخلصوش أكل ، أو لسه بيتكلموا ، أو ………… النسكافيه نسيته ! .. هو برد دلوقتي ! .. طيب المقال اللي كتبه ( أحمد رمضان ) غريب ! .. المقال اللي كتبه ( محمد عماد حجاب ) كويس ، بس لسه محتاج يكون عنده رؤية .. المقال اللي كتبته وريته للناس هنا شكروا فيه ! .. مالي بفكر في مليون حاجة ليه كده ؟! .. عايز أنسى ! .. أنسى ! .. عااااااااايز أنسى ! ..

* * *

الساعة 6 .. مترو .. مشوار طبعاً من روكسي لحلوان .. الغريبة إنه كان هادي النهاردة .. وأنا بجد مكنتش محتاج لده .. ولا يمكن كنت محتاجله ؟! .. مبقتش عارف .. يعني أنا عايز أقعد مع نفسي أفكر في اللي حصل النهاردة .. ولا مش عايز أقعد مع نفسي وأكون وسط ( اللمة ) ، فأنشغل في اللي بيعملوه .. أي حاجة بيعملوها .. إن شاء الله واحد حاطط صباعه في مناخيره !!! .. أنا عايز إيه ؟!! ..

لقيت نفسي أوام بسرعة وصلت حلوان ..
وصلت البيت ..
مكلتش ..
مغيرتش هدومي ..
أقعدت قدام التليفزيون ..
( نادي السينما ) ..
فيلم ( Passion Of Mind ) ..
!!! ..
أنا مش عارف بقيت بفكر الأيام دي على شكل المانشيتات ليه ؟! .. جملة اسمية .. مش عارف أقول حاجة ! ..

- مالك ؟ ..
- ها ! .. مفيش ! .. أنا كويس أهو ! ..
- مش باين ! ..
- يعني ..
- ( تامر ) كلمك النهاردة ؟ ..
- أيوة ! ..
- و ؟ ..
- رفض يعمله ! ..
- القصة وحشة ؟ ..
- مش ال Type بتاعه ..
- انت زعلان عشان كده ؟ ..
- بصي يا ماما .. لو كنت هزعل بجد كنت زعلت على مليون حاجة أشد منها قبلها .. أنا .. الواحد من كثر ما بيشوف هنا في البيت وبرة وبيضايقه .. بقى خلاص طعم الزعل ده .. مبقتش مستطعم .. بقى عادي .. عارفة .. في مرات بسأل نفسي لو أنا مكنتش أنا ، وإنتم مكنتوش إنتم كانت حياتي هتبقى أحسن ؟ .. ولا أوحش ؟ .. أنا مبكفرش بنعمة ربنا .. بس .. بصي .. أنا مش عارف بقول إيه النهاردة .. أنا داخل أنام ! ..

* * *

ظلمة ! .. عايز إيه يعني من واحد قافل النور وباب الأوضة ؟؟ .. إكتئاب بعد اللي حصل ؟! .. سميها زي ما تسميها .. أنا لسه كنت بقلها – وأكيد انت كنت سامع – الموضوع بقى عادي ! .. اللي بيحصل دائماً اجتهاد أوي في الشغل ، وفي النهاية حاجة تبوظ .. لازم في حاجة تبوظه ، وتكون طبعاً برة ارادتي .. حوارات أعملها مع صُناع مسلسل ( تامر وشوقية ) .. تتأخر .. حتى بعد رمضان .. ومش بإيدي ؟! .. ده غير الإختصارات اللي حصلت فيه ! .. أعمل قصة والكل يشيد بيها .. لازم ( تامر ) ميوافقش عليها عشان مش ال Type بتاعه !!! .. أكتب مسرحية في سنتين .. وأقعد ( أدلل ) عليها عشان تتنشر أو تتعمل حتى .. والمسرحية كل اللي بيقراها بيحلف إنها ( ليس في الإمكان أبدع مما كان ) !!! .. إيه اللي في ايدي ؟؟ .. عشان كده مبقتش عايز أحس ! .. بقيت بحاول أبص للأمور بطريقة عادية جداً .. كأنها بتحصل لحد ثاني مش أنا ..

أيوة ! .. بالضبط ! .. فيلم ( Passion Of Mind ) كده ! .. ( ماري ) الأرملة وأم لبنتين في فرنسا .. و ( ماري ) تلاقيها هي هي ( مارتي ) .. الانسانة الجادة ، والعاملة في نيويورك .. مبقتش عارفة – زيي تمام – أنهو شخص هو الشخص الحقيقي !! .. ( ماري ) ولا ( مارتي ) ؟! .. يمكن عشان كده اسم الشهرة بتاعي ( أوسكار ) عاجبني ؟!!! .. بس هما الاثنين أنا ! .. لكن ( أوسكار ) تحس إنه منطلق .. بيحلق في السماء السابعة .. وصل للي نفسه فيه بدليل ( أوسكار وايلد ) .. الكاتب اللي بعشقه ، واللي محدش ينكر إبداعه ، وإبداعه اتسجل في ذاكرة البشر لحد دلوقتي .. أيوة ( محمد عادل ) هو ( أوسكار ) .. الاثنين – زي ما الناس بتقول – ولاد حلال .. بس واحد وصل ، والثاني موصلش .. بيعافر .. بس وبعدين ؟! .. مليون حاجة – بدون ارادته – بيحس إنها ( ضد تياره ) !!!! ..

تفتكروا في يوم هوصل ؟!! .. هييجي يوم أقف فيه قدام المراية وأقول هو ده ( محمد عادل ) اللي بحلم بيه .. وأكون زيي زي ( أوسكار وايلد ) فعلاً .. أنا عارف إني لسه في أول الطريق .. لكن إمتى بس ؟! .. إمتى ؟! ..

لما كان في ( جرس ومحدش بيرد !! ) كنت بقعد أمثل دور الشيطان – بتاع الحلقة اللي فاتت – مع نفسي ، والشيطان نفسه – بتاع الحلقة الرابعة – مكنش أكثر من كونه مُتفرج للي بعمله !! ..

بتكلم بجد .. أصل يعني حاجة غريبة أوي إنك تقعد تتصل بواحد عارفك كويس ، ومن موبيلك ، وميردش عليك !! .. طيب ليه ؟!! .. إيه المانع – حتى لو مش عايز يكون في بينا شغل – إنك ترد عليا ؟!!! .. مش لازم يكون في بينا شغل عشان يكون في بينا علاقة !! .. كنت هتجنن .. بجد مكنتش عارف أقول إيه ! ، وكنت حاسس بإحساس فظيع زي إحساس واحد ( بيتحلقله ) بالضبط .. واللي يغيظ الواحد ده مش عارف ( بيتحلقله ) ليه ؟!! ..

معنوياتي 0 % .. والغريب إن كل شئ في حياتي نزل برضه للمعدل ده ! .. خناقات كثير .. بفكر أسيب شغلي .. كل حاجة إتلخبطت ، لدرجة سألت نفسي :
- ( إيه اللي يحصل لو كان ” تامر ” قال أوكي على القصة ، وكان الفيلم اتعمل ؟!! ) ..
وبعدها برجع أسأل نفسي ثاني :
- ( إيه العلاقة أصلاً بين الحاجات اللي بتحصلي ، واللي بيحصل بيني وبين ” تامر ” ؟!! .. ميكنش ” الاحساس بالفشل ” هو السبب في اللغبطة دي كلها ؟!! ) ..

( ا + ل + ا + ح + س + ا + س + ب + ا + ل + ف + ش + ل = الاحساس بالفشل ) ..

ياااااااااااه ! ..
شايفين الكلمة كبيرة قد إيه ! .. 13 حرف ! .. أكيد الشعور بمعنى الكلمة دي أكبر بكثير من ( 13 حرف ) !! .. كنت بفكر في كل ده ، وأنا قاعد لوحدي .. الليل .. البيت هادي .. زي الحلقة الأولى بالضبط .. كنت عايز أطلع من الشعور ( بالمرارة ) ده .. مفيش غير ( You’ve Got Mail ) ، خاصةً أخويا الوسطاني – راجع الحلقة الثانية عشان تفهم ! – في سابع نومة دلوقتي ! ..

شغلت الفيلم ، وقعدت أتابعه ، بنص عين ونص قلب .. النصين الثانيين كانوا لسه مع موضوع ( تامر ) .. لقيت نفسي بطلب نمرة موبيل ( تامر ) الفجر !!!!!!!!! .. والنتيجة :
( الهاتف الذي طلبته ربما يكون مغلقاً ، يُرجى إعادة المحاولة فيما بعد !! ) ..

في إيه ؟!! .. في إييييييييييييييييييه ؟!! .. ليه كل حاجة آجي أعملها تبوظ بالشكل ده ؟!! .. ليه دائماً ( الفشل ) ملازمني .. متوازين زي سكة الحديد بالضبط !!! ..

ليه ؟!!!!!!!! .. مش عارف إيه اللي فكرني بكلام والدتي في اللحظة دي :
- ( كلمة ” ليه ؟ ” دائماً بتتعب .. لكن المشكلة إننا مبنبطلش نقولها !! .. كإننا غاويين نعذب نفسنا ؟!! ) ..

صحيت فجأة على أغنية ( لجوني ميتشل ) !! .. ( ميج ريان ) صحتني بمشهد في وقته ! ..
- ( سيأتي عيد الميلاد .. إنهم يقطعون الأشجار .. هل تعرف أغنية ” جوني ميتشل ” ؟ .. ” ليت عندي نهر ، أستطيع الرحيل عليه ” .. أغنية حزينة جداً ، لا علاقة لها بعيد الميلاد ! ، لكني فكرت بها الليلة ، وأنا أزين شجرة العيد .. أفتح أغطية أشياء غريبة الصنع ، وأفتقد (( أمي )) إلى درجة انقطاع أنفاسي ! .. أفتقدها دائماً في أعياد الميلاد ، لكن الوضع أسوأ هذه السنة ، لأنني بحاجة لنصائحها ، ولكوب كاكاو ! .. أحتاجها لكي تقول لي بأن كل الأمور السيئة في حياتي ستتحسن ) ..

حسيت إني بدمع .. مبحبش أبان ضعيف قدام حد .. كنت زمان ممكن أبين مشاعري .. لكن دلوقتي صعب جداً .. الناس هي اللي بتضربك بالعصاية لو عملت كده .. العصاية دي يأما ( عدم اهتمام ) بمشاعرك ، أو حتى ( تريقة ) عليها ! .. وأنا بصراحة اتضربت كثير .. كفاية ضرب ! .. كفاية بقى ضرب ! ..

محتاج أوي (( والدي )) دلوقتي .. هو راجل زيي ، هيفهمني ..

* * *

( لما بنكون صغيرين ، بنلاقي الحنان .. بنلاقي الحنان في الوقت اللي مبنحسش بحاجة اسمها ” حنان ” أصلاً ، وفي الوقت اللي محتاجين ” الحنان ” فيه بجد مبنلاقهوش !! )

* * *

مش فاكر كام مرة والدي فكر يناديني عشان ( شيل ده ) ، أو ( عملت إيه مع السباك اللي قولت هييجي النهاردة ؟! ) ، أو ، و أو ، و أو .. لكن اللي فاكره كويس إن مفيش مرة واحدة والدي سألني فيها ( وريني اللي بتكتبه ) ، ويناقشني في اللي بعمله ، أو حتى يشجعني عليه .. ولا مرة ! ..

لقيت نفسي بقدم الفيلم .. عليت الصوت .. سايب أغاني التيتر الأخير بتاعت الفيلم .. قمت .. قعدت أدور في الأوضة .. بحاول أتنطط .. يمكن لو اتنططت الأفكار دي تخرج من راسي ، أو يمكن يكون مخرجها من ( الودان ) ؟! .. طب أحرك راسي يمين شمال بقى ، وأنا بتنطط .. جايز .. يمكن الاحساس ده يخرج ..

- ( بتعمل إيه عندك ؟! ) ..
- ( بابا ! ) ..
- ( بتعمل إيه عندك ؟! ) ..
- ( أصل …. كنت ………………….. ) ..
- ( مفيش أعذار على اللي انت بتعمله ده ) ..
- ( طب من فضلك اسمعني الأول ) ..
- ( أسمع إيه ؟!! .. وأسمع مين ؟!! .. واحد مجنون ! .. واحد عمال يتنطط في الفجر ، ومشغلي ” الزفت ” ده على أعلى صوت .. مش ده الميعاد اللي المفروض ” تتخمد ” فيه برضه ؟؟ ) ..
- ( …………………………. ) ..
- ( يعني مردتش عليا ؟! ) ..
- ( أنا داخل أنام يا بابا .. داخل أنام ) ..

أقفل الكمبيوتر .. أروح الأوضة .. الكل نايم .. أفتح الشيش .. أبص على الشارع .. وأقعد أكلمه .. جايز .. يمكن يحس بيا ! ..

* * *

والتاج لطيف جداً على فكرة ، وأسئلته كانت كالتالي ..

هل كنت طالب شاطر فى المدرسة ؟
جداً .. بس ده كان في المدرسة بس .. بعد كده في جامعة مقولكش .. شيل مواد .. ووصل الموضوع لشيل سنة .. بس الحمد لله على كل حال ..

ايه كانت احب مادة و اكره مادة ليك فى المدرسة و الكلية؟
كنت بحب أوي الفلسفة في ثانوي .. لدرجة إني أخدت مستوى رفيع فلسفة في ثانوي ، والسبب ” مدام سهير ” اللي حببتني أوي في المادة .. والحمد لله جبت في الفلسفة 50 من 50 وجبت في المستوى الرفيع 3 ونص من 5 ..

أما أكثر مادة كرهتها في ثانوي .. فكانت الفيزياء .. واللي كرهني فيها مدرس الله يمسيه بالخير ” الأستاذ عبد الحفيظ ” وكان ” يا حفيظ ” صحيح ..

في جامعة أكثر مادة حبيتها مادة ” تاريخ مصر المعاصر ” ، وبالرغم إني في إعلام بس درستها ، هي مش تاريخ ، بس هي معرفة التاريخ من خلال الروايات والقصص لكُبار الكُتاب .. الغريب في المادة دي إني عملت ورقة للدفعة كلها .. وناس كثير كنت بشرحلهم .. جبت فيها 10 من 20 والناس اللي كنت بشرحلهم 17 و 18 بالرغم إن الإجابات اللي حطوها في المادة هي الإجابات نفسها من الورق بتاعي !!!! ..

وفي الجامعة أكثر مادة كرهتها .. الإحصاء .. مقولكمش .. رابع سنة شايلها أهي .. مع إني جايب في الرياضيات 50 من 50 في ثانوي وأنا شاطر رياضيات .. بس الدكتور مُصر إن الإحصاء عندنا مش عبارة عن مسائل لا عبارة عن (( عرف معنى كلمة ” منحنى تصاعدي ” )) .. الخ !! ..

كنت عايز تتطلع ايه وأنت صغير ؟
ممثل .. ولسه الحلم ده جوايا بس بحققه على الورق من خلال الكتابة .. وعامةً أنا لسه في المجال المسرحي والتمثيلي لحد دلوقتي يعني مسبتوش أوي والحمد لله ..

بمرر التاج ده ل :
مصطفى يحيى
محمد النقيب
توتا
أحمد عبد الفتاح
ياسر خاطر
أميرة سعيد عز الدين

ميعادنا مع الحلقة الرابعة من يوميات ” واحد حب يعمل فيلم ” ، يوم الجمعة ، زي ما اتعودنا ، والحلقات كل جمعة من كل أسبوع ..

محمد عادل \ أوسكار

المكان : مترو حلوان المُتجه إلى محطة التحرير ، أو اللي الناس كلها بتسميها ( وسط البلد ) ..

الزمان : 6 ونص مساءً ..

الحدث : واحد – اللي هو أنا برضه – قاعد في الركن البعيد الهادي .. ماسك قصة ( للدكتور / أحمد خالد توفيق ) .. مش فاكر القصة كان اسمها إيه بالضبط .. لكن في كل الأحوال أنا بحب جداً قصص ( د. أحمد ) .. طبعاً في ناس بتخالفني الرأي ده .. يعني في ناس شايفة إن ( د. نبيل فاروق ) أحسن من ( د. أحمد خالد توفيق ) .. وفي ناس شايفة إن ( د. أحمد خالد توفيق ) أحسن من ( د. نبيل فاروق ) .. وفي ناس شايفة إن الاثنين كويسين ، ومحدش يقدر يستغنى عن الثاني ، لإن الاثنين مجالهم مختلف في الكتابة .. وفي ناس مبتحبش الاثنين بصراحة .. طبعاً الجملة الخالدة في الحالة دي ( لولا اختلاف الأذواق لبارت السلع ) .. مع إضافة ( مع احترامي للكاتبين طبعاً ) اللي بيقلها أي حد لو كان بيقول الجملة دي ! ..

طبعاً زي ما إنتم شايفني أنا قاعد في مترو ( حلوان ) .. ومفيش حاجة بتسليني غير إني أقرأ .. يعني أشغل وقتي بأي حاجة لغاية لما أوصل ( وسط البلد ) عشان أقابل ( تامر ) .. كل شوية أقرى حبة .. وأبص على الشباك حبة ثانية .. يعني تسلية وقت .. وفي نفس الوقت الواحد بيثقف نفسه .. طبعاً الأمر ميخلاش من مواقف كوميدية في المترو الحبيب .. أفتكر في مرة من المرات وأنا ماسك قصة ( للدكتور / أحمد ) – مش فاكر اسمها ، والزهايمر عامل عمايله ، طبعاً لو مش عارف الزهايمر ، راجع الحلقة اللي فاتت ، وبطل كسل !! – كانت في واحدة قاعدة جمبي ، قصادها كان في واحد قاعد ، شكلهم يعرفوا بعض .. البُنية – وأنا بقرأ – عمالة تبحلق في اللي بقراه .. طبعاً مش عارف أقول ايه ! .. وفي نفس الوقت مش عارف إزاي أخوها – ولا يمكن جوزها أو خطيبها – اللي قاعد قصادها مينبهاش للتصرف اللي بتعمله ده ! .. المهم أنا طبعاً بحاول أقرأ ، ومش عارف أقرأ كلمة من الصفحة اللي قصادي .. نفس الإحساس لما تاكل بنفس مفتوحة ، وتلاقي حد باصصلك في اللقمة ، هتقدر تبلع حاجة بعدها ؟! .. فجأة لقيت البُنية بتسألني :

- مش دي قصة للدكتور أحمد خالد توفيق ؟ ..

ياه سؤال ذكي فعلاً ! .. نسيت أقلكم إن الغلاف قصاد عينيها !!! ..

- أيوة هي !

- طيب !

- ؟!

الحكاية دي أحياناً بتتكرر مع ناس ثانية .. يعني أصحابي – أو بعضهم – اتكرر معاهم نفس الموقف .. ده طبعاً بجانب المواقف الثانية المُخجلة اللي ممكن تشوفها في المترو .. خذ عندك .. امتحاناتي في الكلية – نص أو آخر السنة – معادها 8 ونص صباحاً ! .. منه لله اللي بيدينا ( معاد الجيش ) ده .. المهم بنزل من بيتنا الساعة 6 ونص صباحاً عشان يعني أروح الإمتحان في معاد كويس .. تخيلوا خناقة في المترو لرب السما !!!!!!!! .. وبين مين ومين ؟! .. بين السواق وواحد من الرُكاب !! .. ليه وليه واحد من الرُكاب – بتفكرني بواحد من الناس مش عارف ليه ! – حاول يلحق المترو ، قبل ما يمشي ، راح داخل كابينة القيادة ، وخارج منها على الباب اللي بيربط بين الكابينة وأول عربية في المترو !! .. يا جدعان بجد خناقة ، والمترو اتعطل .. ورحت – منهم لله – امتحاني متأخر ..

ملحوظة : هو مين اللي إتمنى إنه يحرق 75 % من المجتمع ؟! ..

* * *

المكان : كافيه ( Costa ) في وسط البلد ، جنب ( الجامعة الأمريكية ) ، أو يعني بعدها بشوية ..

الزمان : 8 إلا ربع مساءً ..

الحدث : قاعد في تربيزة مع ( تامر ) عمالين نتكلم .. طبعاً دي أول مرة نشوف بعض فيها .. لكن ده ممنعنيش إني أتأمل ( Costa ) فرع ( وسط البلد ) .. المكان حلو فعلاً .. كافيه صغير .. وصغير دي بالنسبالي مشكلة لأنك بتحس إن الترابيزات جنب بعضها ، واللي قاعد في الترابيزة اللي جنبك ، كأنه قاعد معاك ، متفرقش كثير !! .. طبعاً الخواطر السريعة دي اتقاطعت لما سألني ( تامر ) :

- انت عرفتني إزاي ؟! ..

مش هخوت دماغكم ، قلتله نفس الحلقة الأولى بالضبط ، وطبعاً ضيفت :

- أنا من المهتمين بالمجال .. الحقيقة مقدرش أقلك إن الناس العادية عارفينك كويس .. لكن اللي مهتمين بالمجال السينمائي – زي حالاتي – يسمعوا عنك .. وطبعاً اللي سمعته عنك كويس .. مع إني الحقيقة مشوفتلكش أفلام ..

- لازم تشوف طبعاً الأفلام اللي عملتها .. عندك ( DVD ) ؟ ..

- الحقيقة لا .. بس ممكن أتصرف ..

- اوك .. المرة الجاية هجبلك معايا الأفلام اللي عملتها ..

- تمام ..

- جبت القصة معاك .. لحسن موصلتنيش خالص ..

- اتفضل ..

بعد الكلام القصير عن الشغل ده ، أو اللي مفترض يكون بإذن الله .. اتكلمنا أنا و ( تامر ) عادي في حاجات ثانية خالص .. لاحظت إنه متضايق شوية .. وسألته طبعاً .. وقالي إنه متضايق جداً للي بيحصل في لبنان – متنسوش إن الفترة دي كانت الحرب شغالة بين ( لبنان ) و ( اسرائيل ) – لإن ليه أصدقاء هناك .. معرفتش أقله إيه ! .. ( حاجة تحزن ! ) ، جدتي كانت بتقولها ، وفعلاً دي أحسن حاجة تقدر تقولها دلوقتي :

- حاجة تحزن ! ..

- فعلاً ! ..

صمت ! ..

- الغريب إني لما شفتك يا ( تامر ) مصدقتش إنك خريج صحافة !! .. يعني شكلك كويس ، ولبق في كلامك .. كنت ممكن تطلع مذيع .. هو انت ليه مدخلتش قسم ( إذاعة وتليفزيون ) بدل ( صحافة ) ؟ ..

- دخلت Interview إذاعة بس مقبلتش .. ده كان بسبب المجموع .. فإضطريت إني أدخل صحافة ..

- انت دفعة كام ؟ ..

- 1993 ..

- ياه ! .. انت قبل مني بكثير .. عارف ( د / أشرف صالح ) ؟ ..

- آه طبعاً ده كان مُعيد على أيامنا ..

- يا راجل ! .. ده كان رئيس القسم لفترة .. طب تعرف …………..

قعدنا فترة نتكلم على الكلية .. ذكريات .. ورا ذكريات .. بعدها قمنا .. اتمشينا شوية .. أنا كنت فاكر إن ( تامر ) ساكن في ( مصر الجديدة ) ..

- إشمعنى ( مصر الجديدة ) يعني ؟! ..

- يعني شكلك بيقول كده ! ..

إجابة تضحك طبعاً ! .. ده عامل زي ( شيرلوك هولمز ) اللي يعرف كل حاجة عنك ، من خلال لمسة إيديك !! .. على العموم مش مهم ..

- أمال انت ساكن فين يا ( تامر ) ؟ ..

- ( وسط البلد ) ! ..

يا بختك ! .. أنا طبعاً هخبط ييجي ساعة كمان عشان أرجع بيتنا .. المشكلة إن مفيش حد بقابله إلا ويقلي :

- انت ساكن فين يا ( محمد ) ؟ ..

- ( حلوان ) ! ..

- ياه دي بعيدة أوي ! ..

عااااااااااا ! .. كإني مش عارف إنها بعييييييييييييييييدة ! .. على العموم الواحد خلاص إتعود .. يعني لو سكنوني بعد كده في ( وسط البلد ) – زي ( تامر ) – ومفيش 5 دقائق مثلاً ووصلت لبيتنا ، هحس بفراغ فظيييييييييييع ! .. فين زحمة المترو ؟! .. وفين الخناقات اللي واحد إتعود عليها خلاص ( بين الراكب والسواق \ بين واحدة وواحد ، وده لكذا سبب ، من أشهرهم المعاكسات ! ) .. حتى لو الواحد ساب المترو وراح الميكروباص .. فين خناقات الميكروباظ – بلغة السواقين – عشان ربع جنيه ؟! .. ياه ! .. بجد حاجة لو الواحد سابها يحس بفراغ فظييييييييييييع ! ..

ملحوظة تبع الملحوظة اللي فوق : يا بختك برضه يا تامر .. إهئ ! .. سنيف ! ..

( تامر ) وصل بيتهم – وقطع الخواطر دي كالعادة ! – وسابني .. قعدت بعدها أتمشى شوية ، وفي سؤال محيرني الصراحة .. ( يا ترى أركب مترو ولا ميكروباص عشان أرجع بيتنا ) ؟؟ ..

* * *

مر أسبوع بعد آخر مرة قابلت فيها ( تامر ) .. ومتصلش بيا طول المدة دي .. مش عارف ليه ( الزهايمر ) مكنش رحيم بيا المرا دي ، وخلاني أنسى الموضوع .. وقعد ( شيطاني ) يوسوسلي بصورة شنيعة :

- جايز القصة معجبتوش ، وعشان كده طنشك ..

- أممكن ! .. ( نقلاً عن مسرحية ” عفروتو ” ! ) ..

أسبوع بحاله و ( تامر ) متصلش .. طيب حتى لو القصة معجبتوش يقلي .. يووووووه .. ( الشيطان ) مش عاتقني :

- يا سيدي ! .. تفتكر واحد زيك يعجبه أصلاً .. ده بقى حالك .. يبقى إيش حال قصتك يا عمونا ..

- أممكن ! .. ( نقلاً عن مسرحية ” عفروتو ” ! .. مش عارف أي مشهد ؟! .. يبقى راجع المسرحية عشان تعرف ! ) ..

حاولت الفترة دي أشغل نفسي بأي حاجة .. عاهدت نفسي إني مش هتصل بتامر .. يعني مش عايز أحرجه ، والأهم إني مش عايز أحرج نفسي .. قعدت مع والدتي نتكلم في أي حاجة .. طبعاً مسائل عوائلية إنتم ملكمش دعوة بيها .. عايزين تعرفوا دي كمان ؟! .. يعني هيكون إيه يا جدعان غير مشاكل والدي واخواته والميراث ، ومين خد إيه ، ومين قرص مين ؟!! ، وابن العم اللي جاي من عند ابن خالتي اللي مش عارف كان بيحلب البقرة أيام ما كان صغير .. مشاكل ملهاش أول من آخر .. لاحظت إن معظم الأبهات – جمع ( أب ) ! – اللي من جيل الستينات أو السبعينات أو حتى الثمانينات مشاكلهم بتنحصر في الموضوع ده ، أو موضوعات ثانية مش هخوت دماغكم بيها ..الأبهات ميعرفوش قد إيه المشاكل دي مبتأثرش على علاقته بأقرايبه وبس .. لا .. دي بتأثر كمان على علاقة ولاده بيهم وبولادهم كمان ..

( يعملوها الكبار ويقعوا فيها الصغار ) .. هو مين العبقري اللي صاغ كل البطيخ ده في العبارة اللي فاتت ؟؟ ..

طبعاً والدتي بتتأثر بالمشاكل دي .. حاجة غير طبيعية في حياة ولادها أكيد بتأثر عليها .. حبيت أقلها سيبينا من ده كله ، وفعلاً عرفت أخليها – بذكائي – تتنقل لموضوع ثاني خالص .. بحب أوي أقعد أسمع حكايات والدتي ، وهي صغيرة .. أولاً والدتي – بشهادة أصحابي كمان – من النوع العسول جداً .. تحب تتكلم معاها .. وجدتي التركية – اللي هي والدة والدتي – برضه كانت بتقعد تعمل معانا كده .. تعرفوا أنا عمري ما قلت في حياتي لجدتي ( ستو ) أو لجدي ( سيدي ) .. دائماً بنقلهم ( مُوما \ جدتي ) و ( بُوبا \ جدي ) .. والدتي واخواتها – خلاني وخالاتي – بيقللهم كده ، وإحنا – أحفادهم – بنقلهم كده برضه !! ..

أفتكر في مرة سألت والدتي مين فعلاً اللي خلانا نقول ( بُوبا ) و ( مُوما ) ؟؟ .. قالتلي إنها متعرفش .. بس الأساس في الموضوع – زي ما توقعت – جدتي .. مش تركية بقى ؟! .. كنت بضحك جداً من الحكايات اللي بتقلهالي والدتي عن طفولتها .. قالتلي إنها لما كانت صغيرة وبتعمل حاجة غلط ، فجأة تلاقي جدتي – تركية العرق ، مصرية النشأة – قلبت .. وتقعد تقول كلام غريب كده بالتركي .. الظاهر بتقول حاجة كده مش ولا بُد ! .. قعدنا – أنا ووالدتي – نحكي في الذكريات اللي من النوع ده .. طبعاً الأمر ميخلاش من توتر في العلاقات بين خلاني وخالاتي ووالدتي طبعاً معاهم .. زيهم زي والدي وعمامي وعماتي .. لكن الأكيد في عيلة والدتي إنهم بيرجعوا اخوات ثاني .. وصافي يا لبن ، حليب يا إنجوي .. ده طبعاً عكس والدي وعمامي وعماتي تماماً ..

الزعل بيسبب شروخ في أي علاقة ، مهما كان نوعها .. أنا عارف كده كويس .. وأنا ذات نفسي لما بزعل من حد مبعرفش – ومبقدرش – أسامح بسهولة .. أنا عارف إن فيكم واحد هيقلي :

- دي حاجة مش كويسة ..

لكن أعمل إيه في نفسي ؟! .. دي طبيعتي .. بحاول – على قد ما أقدر – إني أقلل الموضوع ده .. وبقعد أفكر في كلام والدتي :

- حتى لو زعلت من حد ، متقاطعهوش إلا لو ملقتش قدامك غير الحل ده ، لكن حاول على قد ما تقدر متعملش كده ، حتى لو وصل الموضوع ل ( صباح الخير يا جاري .. انت في حالك وأنا في حالي ) ، بس اسمك مقاطعتش حد ! ..

الزعل شئ مش كويس .. بس الأوحش الشرخ اللي بيحصل في علاقتك مع حد .. يمكن علاقتك ترجع بيه زي الأول .. لكن هيفضل الشرخ ده موجود في علاقتكم .. وفي أول خناقة هتتذكر الشرخ اللي فات واللي خدش الحاجة الجميلة اللي كانت بينكم ..

أنا مش عارف ليه حاسس بإكتئاب توغل – زي مبيد الحشرات ( ريد ) – في الحلقة دي .. بس كل حاجة بتجيب اللي وراها زي ما إنتم عارفين .. المهم .. سيبونا من الكلام ده كله ونرجع لمرجوعنا .. يوم الأربعاء .. طبعاً كده فات أكثر من 5 يوم – على رأي واحدة زميلتي ، مثقفة جداً بالمناسبة ! – بعد أول – وآخر لحد دلوقتي – مرة قابلت فيها ( تامر ) .. أتصل بيه ولا لا ؟؟ .. طيب هتصل بيه ..

تررررررررررررررررررررررررررن ( وماله لو ليلة توهنا بعيد وسيبنا كل الناس \ Call Tone !! ) ..

- آلو ..

- آلو .. سلام عليكم .. إزيك يا تامر ؟ ..

- تمام ..

- معاك محمد عادل ..

- آه .. إزيك يا محمد ؟ ..

- الحمد لله .. إيه يا باشا فينك ؟! ..

- أبداً والله يا محمد .. أصلي الفترة اللي فاتت بحضر نفسي للسفر ..

- سفر ! .. فين إن شاء الله ؟ ..

- بيروت ! ..

- $#@%^^^&

- أيوة عارف هتقول إيه ! ..

- الحقيقة أنا مش عارف أقول إيه ! .. على العموم تروح وتيجي بالسلامة إن شاء الله ..

- على فكرة أنا قريت القصة ..

- طب تمام ..

- وكنت عاوز أقلك رأيي ..

- أوك .. تحب نتقابل فين ؟ ..

- لا مش هينفع .. أصلي مسافر بكرة ..

- ^$%#%$##$##$ ..

- هقلك على حاجة أنا هكلمك بكرة الصبح .. أوك ؟ ..

- تمام .. يلا السلام عليكم ..

- مع السلامة ..

وقفلت الموبيل وأنا شاكك إن ( تامر ) ممكن يتصل بيا أصلاً .. وراح ( شيطاني ) – ونيسي في الحلقة دي – يكمل مهمته :

- شكله كده بيتهرب منك ..

- الله يحرقك بجاز وسخ ! ..

* * *

لما لقيت نفسي بعت إيميل لتامر – المخرج يعني – إندهشت من نفسي جداً !! .. يعني أنا مش من الناس اللي بتعمل أي حاجة كده إلا لما تفكر كويس .. بس الظاهر إن إيديا كانت أسرع من تفكيري .. على العموم أهو الواحد مخسرش حاجة ، وأديني محرمتش نفسي من إني أشتغل في الموضوع ده ..

طبعاً مر يومين ، وأنا – كعادتي – نسيت كل حاجة عن الموضوع ده .. لا إلا حكاية ( نسيت ) دي .. أنا متهيألي إن عندي ( الزهايمر ) ، وأنا معرفش !! .. بتكلم بجد .. تخيلوا مثلاً واحد بيحط الموبيل جوه مكتبه ، مفيش 5 دقائق إلا ويقعد يدور على الموبيل !! ..

- فين الموبيل يا عااااااااااااالم ؟!! ..

- إفتكر إنت حطيته فين ..

- لا إنتوا أخدتوه أصلي أنا عارف ………………….

ويبدأ ( الموشح الأندلسي ) ، وأبقى زيي زي ( عم توفيق ) تمام .. اللي ميعرفش ( عم توفيق ) بقوله راجع الحلقة اللي فاتت ، وإنت هتعرف كل حاجة .. بطلوا كسل بقى !! ..

المهم .. زي ما قلت .. مر يومين .. لا حس ولا خبر .. وفي يوم وصلني إيميل من ( تامر ) ، بيقول فيه :

Dear Mohamed,

Thank you for your message

It’s a pleasure to read your short story…

Can you send it by mail? If not just send me your phone number and I’ll call you to fix a meeting.

Awaiting your replay.

Best regards.

Tamer

طبعاً الرسالة مش محتاجة لتعليق .. في ناس مش فاهمة !! .. طيب يا أخوانا .. ( تامر ) – بالمختصر المفيد – بيقول إنه عايز يقرأ القصة ، يإما أبعتهاله إيميل ، أو أبعتله رقم تليفوني عشان نحدد معاد نتقابل فيه .. طبعاً أنا قعدت فترة أفتكر مين ( تامر ) ده أصلاً !! .. مش بقلكم ( زهايمر ) !! .. لما إفتكرت ، قلت أرد عليه بقى .. رحت دايس ( Reply ) ، ورحت كاتب الرد :

((( السلام عليكم .. عزيزي تامر .. أتمنى أن تكون بخير .. أشكرك عزيزي على رسالتك .. بالنسبة للقصة ، فهي مُرفقة مع الرسالة ، على الرغم من أن المقابلة المباشرة أفضل بكثير في هذه الأحوال !! ، على أية حال ها هو رقم ” الموبيل ” ……………… إن أحببت الإتصال بي .. تحياتي محمد عادل عبد العظيم .. ملحوظة : مستني رأيك في القصة .. ملحوظة تبع الملحوظة اللي على الجنب : يا ريت متغيبش علينا !! ))) ..

بعد ما بعت الرسالة .. لقيت نفسي قاعد فاضي .. مبعملش أي حاجة .. أووووووف ! .. النت فصل .. كل مرة بتوع السايبر دول بيقولوا إنهم بيفصلوا النت عشان مش عارف بيهببوا إيه .. أنا شاكك أصلاً في اللي بيهببوه ده !! .. بس أعمل إيه ؟! .. ده السايبر الوحيد اللي ممكن الواحد يشترك فيه ، وميزته إنه تحت بيتي طوالي .. يعني مش هلاقي أحسن من كده .. البني آدم مننا أحياناً يلاقي نفسه مضطر إنه يقبل حاجات ، يمكن هو مكنش بيقبلها قبل كده .. يعني أنا مثلاً قريت قصة ( للدكتور / أحمد خالد توفيق ) بعنوان ( أسطورة العشيرة ) ، بداية القصة واحد عايش في لندن ، وسكنه بعييييييييد جداً عن شغله ، بس هو حابب شغله ، وحابب بيته اللي عايش فيه في نفس الوقت .. طب يعمل إيه ؟!! .. إضطر إنه يقبل ، ويحاول يوفق بين الإثنين .. طبعاً إتضح إن قرار التوفيق ده مش لصالحه ، لإنه بيركب المترو من مكان شغله عشان يوصل لبيته ، وركوب مترو لندن خطر – زي ما القصة بتقول – عشان في ( عشيرة ) ساكنة في شبكات المترو ، وبتاكل لحوم البشر !!!! .. بس الحمد لله إني مش عايش في لندن .. ولا بتوع السيبر من أكلة لحوم البشر !! ..

طيب أعمل إيه دلوقتي وأنا فاضي كده ؟ .. همممممم .. آه .. أتفرج على فيلم زي عوايدي .. بس عايز فيلم لطيف ، أقدر أشوفه على الجهاز .. أيوة .. هو ده .. ( You’ve Got Mail ) .. مع إني شفت الفيلم ده أكثر من 5 مرات .. بس الحقيقة الفيلم ده من أروع الأفلام الرومانسية اللي ممكن تشوفها في حياتك .. أخويا الوسطاني رأيه غير كده .. أولاً هو بيكره الأفلام الرومانسية .. ثانياً هو بيكره ( Meg Ryan ) بطلة الفيلم أصلاً .. طبعاً أنا بحبها .. هو شايف إن وشها طفولي أكثر من اللازم ، وأنا شايف إن وشها الطفولي ده أكسبها قدرة هايلة على منح ( ريئكشنات \ Reactions ) غاية في الجمال والروعة .. طبعاً مين اللي دخل عليا ، وأنا بتفرج على الفيلم .. مييييييييييين ؟ .. أخويا الوسطاني طبعاً ! ..

- يييييييييييه .. هو إنت مش هترحمنا من الفيلم ده بقى ، وتشيله من على الجهاز ..

- أوعدك إني هشيله ، لما أعمل إسطوانة للفيلم ده ..

- نعم !! .. إسطوانة للفيلم ده ؟!! .. لا حول ولا قوة إلا بالله .. يا إبني ……………………….

جرررررررر ! .. هي العيلة كلها بقت زي ( عم توفيق ) ولا إيه !! ..

جرس الموبيل رن فجأة عشان يرحمني من ( الموشح الأندلسي ) بتاع أخويا .. شاورتله بإيدي إنه يسكت .. ولو كنت أطول كنت عملت ( Mute ) لصوته ! .. المهم الموبيل بيرن ، ونمرة غريبة اللي بتتصل .. ربنا يستر ! ..

- آلو .. محمد عادل معايا ؟ ..

- أيوة .. مين معايا ؟ ..

- تامر .. تامر السعيد ..

بعد دقيقة من الصمت (( الزهايمر عامل عمايله !! )) ..

- آه ! .. إزيك يا تامر ؟ .. إيه الأخبار ؟ ..

- تمام .. إنت أخبارك إيه ؟ ..

- الحمد لله ..

- بقلك يا محمد القصة موصلتنيش ..

- ؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!

- أيوة موصلتنيش ..

- يمكن في حاجة في الإيميل بقى ! .. على العموم هبعتهالك ثاني ..

- اوك .. المهم كنا عايزين نتقابل ..

- اوك .. تحب نتقابل فين ؟ ..

- وسط البلد .. الجمعة ..

- مفيش مشكلة .. خليها على 7 ونص \ 8 بليل كده ..

- تمام ..

- اوك يا باشا .. فرصة سعيدة ..

- أنا اللي أسعد ! ..

تك ! .. تيت ! .. أي حاجة بتعبر بالنسبالك عن صوت قفل الموبيل !! ..

طيب أحاول أبعت القصة مرة ثانية لتامر .. يوووووووووه .. نسيت إن النت مفصول ! .. على العموم أنا هقابل ( تامر ) الجمعة ، يعني بعد يومين .. مش مشكلة لو الراجل صبر يومين كمان ، لغاية لما نتقابل ، أديله الكتاب اللي فيه القصة ، ويقراها براحته بقى .. خلينا دلوقتي في ( You’ve Got Mail ) ..

- محمد .. محمااااااااااااااااااااااااااااااااااااااااااد ..

صوت السيد الوالد اللي عمري ما هقدر أغلط فيه أبداً .. و( نداء طرزان ) ده معناه إن السيد الوالد عايزني ((( ضروري ))) .. يبقى مفيش قدامنا غير إننا نعمل ( Shut Down ) للكمبيوتر !! ..

تخيلوا واحد بينام الساعة 8 بليل زي الفراخ ، ممكن يصحى الساعة كام ؟ .. يعني أنا لو نمت بدري كده بصحى في حدود 5 أو 6 الصبح .. طبعاً أنا مليش عادة محددة في أوقات النوم دي .. ممكن أنام بدري جداً .. وممكن برضه أنام متأخر جداً .. أصل الصيف والحر وجو مصر اللي مبقاش جوها المعروف كل دي عوامل – من وجهة نظري – بتأثر على موضوع النوم والصحيان بدري ده ..

المهم سيبونا من ده كله .. أنا صحيت الساعة 6 الصبح .. قمت من النوم .. دخلت الحمام .. و … إحم ! .. خرجت من الحمام .. دخلت على أوضة الصالون اللي فيها الكمبيوتر .. المشكلة الأزلية إني مليش أوضة لوحدي .. ليا أوضة مشتركة مع إخواتي الصبيان .. وطبعاً أختي هي الوحيدة اللي ليها أوضة لوحدها .. فعلاً البنات رزقهم في رجليهم ! .. لكن مش مشكلة .. عارفين ليه ؟ .. الساعة 6 الصبح الناس – والبيت وده الأهم – بياكلوا رز مع الملائكة دلوقتي .. بحس لما بقوم من النوم في الوقت ده بالنشاط .. الخصوصية .. بس الأهم من ده كله إني هعرف أقعد على الكمبيوتر براحتي بعيداً عن دوشة البيت .. الحقيقة البيت مبيخلاش .. ومرة قلتلهم – بالحرف – بجد بحس إنكم لما بتسيبوا البيت بالإنتعاش ، لإن الكرنفال اليومي بيكون ( فينيتو ) .. لو إنتم – بكلم إخواتي الصبيان – سيبتوا البيت ، فيه أختي المُزعجة .. لو أختي وإنتم سيبتوا البيت ، فيه والدتي اللي مبتسبنيش لحالي .. ولو كلكم سيبتوا البيت ، ما عدا السيد الوالد ، لااا ! ، دي بقى حكاية !! ، أصلي نسيت أقولكم إن مكتب والدي في الصالون اللي فيه – زي ما قلت قبل كده – الكمبيوتر ، وطبعاً زي كل أب بيحترم نفسه ، يشوف إبنه قاعد قدام الكمبيوتر ، وهو بيشتغل ، إزااااااااااااي !! ..

- قوم سيبني أشتغل ..

- حاااااااااااضر يا بابا .. عااااااااا .. اهئ اهئ ..

مأساة ! .. فمفيش غير حلين عشان أعرف أحس بالخصوصية .. يإما كل اللي في البيت يسيبوا البيت ويقعدوا في حتة ثانية .. ودي من رابع المستحيلات .. يإما أقوم بدري وهما نايمين .. وده الحل الأقرب للتطبيق .. بدخل المطبخ .. بحضر كباية شاي .. وبدخل بالكباية للبالكونة .. بقعد أتأمل في كل حاجة .. وأفكر .. ياه الكون فعلاً بيبقى جميل .. هدوء .. وجو مصر بيبقى في الوقت ده غير جوها الظهر أو العصر أو حتى بليل .. كل حاجة في الوقت ده صعب تتوصف .. هي تتعاش أكثر .. صدقوني ! ..

طبعاً ساعتين مروا عليا ، وأنا مش واخد بالي خالص .. نسيت نفسي .. ونسيت إني أشرب كباية الشاي لما تبرد زي كل مرة .. ونسيت الكمبيوتر اللي المفروض ألحق أقعد عليه في هدوء .. أخلص شغلي .. أو أتفرج على فيلم .. أو أعمل أي حاجة عليه .. لكن اللي فوقني من كل ده .. خبطة والدي على باب البالكونة بينبهني إني أشوف مين اللي بيخبط على الباب .. فتحت .. لقيت ( عم توفيق ) بواب العمارة .. الراجل ده الحقيقة يبرطم بسبب أو من غير سبب .. تسأله يعملك حاجة .. يطلع روحك في مناقشتها ، وفي الآخر بيعملها !! ..

- خذ يا ( عم توفيق ) هات ب 75 قرش فول و 50 قرش طعمية ..

- مهو ..

هيبرطم ( عم توفيق ) زي عوايده .. يظهر والدي في اللحظة دي ..

- في حاجة يا ( توفيق ) ؟! ..

- لا مفيش !! ..

ويمشي ( عم توفيق ) ، ويديني الجرنال .. بقعد أضحك بيني وبين نفسي .. مفيش فائدة ! .. بمسك ( الأهرام ) .. آه النهاردة الأربعاء .. يعني يوم صفحة السينما ..

الحقيقة صفحة السينما يوم الأربعاء هي صفحة إعلانات عن الأفلام الجديدة ، ويمكن تلاقي حبة مواضيع كويسين ممكن تقراهم ، بس ده كله فين وفين بقى ! .. مشكلة صفحات السينما عندنا في مصر إنها بتتعامل مع السينما على أنها وسيلة ترفيهية ، وآه لو يعرفوا الفنون أهميتها قد ايه عند الشعوب .. حتى في الكلية – مهو أنا نسيت أقولكم إني بدرس صحافة – بيتعاملوا مع الفنون على إنها ( كماليات ) ، وملهاش لزمة !! .. حاولت في مرة أطلع بمشروع التخرج بتاعي مجلة سينمائية .. يا بوياااااااااااااا على اللي حصل !! .. رئيسة القسم اللي متتسماش .. قعدت تقول :

- لا لا لا ..

- طب حضرتك عايزة إيه يا ( حاجة ) ؟!! ..

( حاجة ) دي طبعاً مقولتهاش !! ..

- أنا عايزة مجلة عن البيئة ..

- دي هتبقى ( بيئة ) فعلاً !! ..

على كل حال أنا بحب أتابع السينما ، وأقرأ المقالات .. أهي ( ثقافة ) على الماشي برضه .. وأنا بتابع صفحة سينما الأهرام بتاعت يوم الأربعاء استوقفني عنوان ((( افتتاح حزين لمهرجان السينما العربية بباريس ))) .. ملخص الموضوع إن أحداث لبنان الأخيرة خيمت على مهرجان سينما العالم العربي بباريس ، وإن في حضور مصري قوي السنة دي سواء على مستوى الأفلام الروائية ( عمارة يعقوبيان \ حليم ) ، أو على مستوى الأفلام القصيرة ( الجنيه الخامس لأحمد خالد \ البنات دول لتهاني راشد \ بيت من لحم لرامي عبد الجبار \ يوم الإثنين لتامر السعيد \ …… ) .. إستنى هنا ! .. لاحظت في وسط الكلام المكتوب إن فيلم ( يوم الإثنين ) – فيلم مصري قصير – لمخرجه ( تامر السعيد ) إنتاج شركة ( Hot Spot Films ) ، والحقيقة أنا أول مرة أسمع عن شركة الإنتاج دي ، وحيث إني من المهتمين بالمجال السينمائي ، فحبيت أبحث عن إسم الشركة .. أووف ! .. ال Connection بطئ فحت !! .. تلاقي ( حد إبن حلال ) بيحمل حاجة كبيرة وساحب السرعة .. طيب أقوم شوية كده .. أكل أي حاجة .. وبالمرة أسيب ال Internet Explorer يحاول الدخول على Google في وسط زحمة السرعة دي ..

أفطر إيه ؟!! .. أفطر إيه ؟!! .. آه ! .. مانجة ! .. أهو تغيير .. الحقيقة أنا بحب الصيف – كنا صيف وقتها ! – عشان المانجة بالذات .. تخيلوا معايا فاكهة زي دي بتعمل إيه في البني آدم .. بتكلم بجد .. أنا في مرة كنت متضايق جداً ، ولما أكلت المانجة ، حسيت إني ( مروق ) بعدها .. عشان كده بسمي المانجة ( الفاكهة المرحة ) .. طيب أرجع أشوف الصفحة فتحت على جوجل ولا لسه .. أهو الجوجل قدامي ، فاتحلي دراعته .. طيب والنبي يا سي جوجل إعملي Search على ( هوت سبوت فيلمز ) .. همم !! .. باكل مانجة .. وأنا عارف إن والدي هيطلع يزعق ، عشان باكل مانجة قدام الجهاز .. طيب نخلص بسرعة بقى .. آه .. إيه ده ؟!! .. ده في كذا موقع عن ( هوت سبوت فيلمز ) ، بس كل ما أدخل على واحد منهم يجبلي الصفحة بيضااااااا ، والعبارة الخالدة ( The Page Cannot Be Displayed ) !!! ، أنا كل اللي عرفته إن الشركة دي في الإمارات ، وموقعها مبيتفتحش .. هممم !! .. طب ندخل على ( CinemaEast Film Festival ) جائز نلاقي فيها حاجة .. هنا بقى لقيت الموقع عن أفلام ( مهرجان سينما العالم العربي بباريس ) ، ومفيش حاجة طبعاً عن ( هوت سبوت فيلمز ) !! .. إيه اليوم الرائع ده !! ..

- أنا مش قلت محدش ياكل في الصالون ..

- أصل يا بابا ……..

- مفيش أصل ، قوم دلوقتي ، عايز أشتغل ..

- طيب هشوف حاجة 5 دقائق كده عقبال ما تصلي الفجر ..

صمت ! ..

- ماشي ، 5 دقائق مش أكثر من كده ..

طيب بسرعة بقى .. مفيش حاجة عن ( هوت سبوت فيلمز ) أقفل الصفحة و … لحظة ! .. إيه ده ؟!! .. دي صفحة كاملة عن المخرج ( تامر السعيد ) صاحب الفيلم القصير ( يوم الإثنين ) ، والصفحة بتقول :

((( تامر السعيد وُلد في القاهرة عام 1972 ، ودرس الصحافة في كلية الإعلام بجامعة القاهرة ، كما درس في المعهد العالي للسينما ، كما عمل كمساعد مخرج بعد ذلك في عدد من الأفلام ، وأخرج عدد من الأفلام القصيرة والوثائقية مثل ” يوم الإثنين ” ، ” شارلي ” ، ” 18 سبتمبر ” .. بلا بلا بلا ))) .. !!! ..

الحقيقة مش عارف جتلي الفكرة إزاي !! .. هي الفكرة جوايا من فترة مش قريبة ولا بعيدة .. بس هي جوايا .. نفسي بجد أحول قصة من قصصي لفيلم قصير ، وفي قصة – من وجهة نظري – تنفع لكده .. طبعاً ده حلم بيراود كل واحد مننا .. طيب ! .. إيه المانع لو أجرب ، وأبعت E-Mail لتامر ، وخصوصاً بقى إن إيميله موجود في نفس الصفحة الخاصة بالتعريف عنه ! .. وبعدين أديني جربت حظي ، عشان بعد كده أقول إني محرمتش نفسي من حاجة .. مع إني عارف النتيجة مُقدماً ، وهي إن ( تامر ) إستحالة يرد عليا !! .. في الوقت اللي كنت بفكر فيه ، لقيت إيديا بتفتح المسنجر !! .. إيديا بتاخد إيميل ( تامر ) Copy \ Paste !! .. إيديا بتكتب الرسالة اللي كان نصها !! :

((( السلام عليكم .. عزيزي تامر .. أتمنى أن تكون بخير .. قرأت عنك عزيزي من خلال بحثي عن شركة Hot Spot Films، ولم أجد موقع الشركة للأسف !! .. على أية حال أحببت أن أتقدم لك بقصة قمت بكتابتها ، ونُشرت في كتاب بالفعل ، والحمد لله أن القصة نالت إستحسان كل من قرأها ، وفكرت في أن القصة من الممكن أن تُحول إلى فيلم سينمائي قصير .. ما رأيك ؟ .. تحياتي محمد عادل عبد العظيم .. ملحوظة : بالمناسبة فرحت كثيراً عندما علمت أنك خريج كليتي ، وأنك كنت منضماً لنفس القسم صحافة .. ملحوظة تبع الملحوظة اللي على الجنب : ده إيميلي ……….. لو حبيت يكون بينا إتصال ))) ..

وراحت إيديا دايسة (send ) !! ..
ونكمل المرة الجاية ..