في الانتظار

( 3 )

 

المكان : مترو حلوان المُتجه إلى محطة التحرير ، أو اللي الناس كلها بتسميها ( وسط البلد ) ..

 

الزمان : 6 ونص مساءً ..

 

الحدث : واحد - اللي هو أنا برضه - قاعد في الركن البعيد الهادي .. ماسك قصة ( للدكتور / أحمد خالد توفيق ) .. مش فاكر القصة كان اسمها إيه بالضبط .. لكن في كل الأحوال أنا بحب جداً قصص ( د. أحمد ) .. طبعاً في ناس بتخالفني الرأي ده .. يعني في ناس شايفة إن ( د. نبيل فاروق ) أحسن من ( د. أحمد خالد توفيق ) .. وفي ناس شايفة إن ( د. أحمد خالد توفيق ) أحسن من ( د. نبيل فاروق ) .. وفي ناس شايفة إن الاثنين كويسين ، ومحدش يقدر يستغنى عن الثاني ، لإن الاثنين مجالهم مختلف في الكتابة .. وفي ناس مبتحبش الاثنين بصراحة .. طبعاً الجملة الخالدة في الحالة دي ( لولا اختلاف الأذواق لبارت السلع ) .. مع إضافة ( مع احترامي للكاتبين طبعاً ) اللي بيقلها أي حد لو كان بيقول الجملة دي ! ..

 

طبعاً زي ما إنتم شايفني أنا قاعد في مترو ( حلوان ) .. ومفيش حاجة بتسليني غير إني أقرأ .. يعني أشغل وقتي بأي حاجة لغاية لما أوصل ( وسط البلد ) عشان أقابل ( تامر ) .. كل شوية أقرى حبة .. وأبص على الشباك حبة ثانية .. يعني تسلية وقت .. وفي نفس الوقت الواحد بيثقف نفسه .. طبعاً الأمر ميخلاش من مواقف كوميدية في المترو الحبيب .. أفتكر في مرة من المرات وأنا ماسك قصة ( للدكتور / أحمد ) – مش فاكر اسمها ، والزهايمر عامل عمايله ، طبعاً لو مش عارف الزهايمر ، راجع الحلقة اللي فاتت ، وبطل كسل !! – كانت في واحدة قاعدة جمبي ، قصادها كان في واحد قاعد ، شكلهم يعرفوا بعض .. البُنية – وأنا بقرأ – عمالة تبحلق في اللي بقراه .. طبعاً مش عارف أقول ايه ! .. وفي نفس الوقت مش عارف إزاي أخوها – ولا يمكن جوزها أو خطيبها – اللي قاعد قصادها مينبهاش للتصرف اللي بتعمله ده ! .. المهم أنا طبعاً بحاول أقرأ ، ومش عارف أقرأ كلمة من الصفحة اللي قصادي .. نفس الإحساس لما تاكل بنفس مفتوحة ، وتلاقي حد باصصلك في اللقمة ، هتقدر تبلع حاجة بعدها ؟! .. فجأة لقيت البُنية بتسألني :

 

- مش دي قصة للدكتور أحمد خالد توفيق ؟ ..

 

ياه سؤال ذكي فعلاً ! .. نسيت أقلكم إن الغلاف قصاد عينيها !!! ..

 

- أيوة هي !

 

- طيب !

 

- ؟!

 

الحكاية دي أحياناً بتتكرر مع ناس ثانية .. يعني أصحابي – أو بعضهم – اتكرر معاهم نفس الموقف .. ده طبعاً بجانب المواقف الثانية المُخجلة اللي ممكن تشوفها في المترو .. خذ عندك .. امتحاناتي في الكلية – نص أو آخر السنة - معادها 8 ونص صباحاً ! .. منه لله اللي بيدينا ( معاد الجيش ) ده .. المهم بنزل من بيتنا الساعة 6 ونص صباحاً عشان يعني أروح الإمتحان في معاد كويس .. تخيلوا خناقة في المترو لرب السما !!!!!!!! .. وبين مين ومين ؟! .. بين السواق وواحد من الرُكاب !! .. ليه وليه واحد من الرُكاب – بتفكرني بواحد من الناس مش عارف ليه ! – حاول يلحق المترو ، قبل ما يمشي ، راح داخل كابينة القيادة ، وخارج منها على الباب اللي بيربط بين الكابينة وأول عربية في المترو !! .. يا جدعان بجد خناقة ، والمترو اتعطل .. ورحت – منهم لله – امتحاني متأخر ..

 

ملحوظة : هو مين اللي إتمنى إنه يحرق 75 % من المجتمع ؟! ..

 

* * *

 

المكان : كافيه ( Costa ) في وسط البلد ، جنب ( الجامعة الأمريكية ) ، أو يعني بعدها بشوية ..

 

الزمان : 8 إلا ربع مساءً ..

 

الحدث : قاعد في تربيزة مع ( تامر ) عمالين نتكلم .. طبعاً دي أول مرة نشوف بعض فيها .. لكن ده ممنعنيش إني أتأمل ( Costa ) فرع ( وسط البلد ) .. المكان حلو فعلاً .. كافيه صغير .. وصغير دي بالنسبالي مشكلة لأنك بتحس إن الترابيزات جنب بعضها ، واللي قاعد في الترابيزة اللي جنبك ، كأنه قاعد معاك ، متفرقش كثير !! .. طبعاً الخواطر السريعة دي اتقاطعت لما سألني ( تامر ) :

 

- انت عرفتني إزاي ؟! ..

 

مش هخوت دماغكم ، قلتله نفس الحلقة الأولى بالضبط ، وطبعاً ضيفت :

 

- أنا من المهتمين بالمجال .. الحقيقة مقدرش أقلك إن الناس العادية عارفينك كويس .. لكن اللي مهتمين بالمجال السينمائي – زي حالاتي – يسمعوا عنك .. وطبعاً اللي سمعته عنك كويس .. مع إني الحقيقة مشوفتلكش أفلام ..

 

- لازم تشوف طبعاً الأفلام اللي عملتها .. عندك ( DVD ) ؟ ..

 

- الحقيقة لا .. بس ممكن أتصرف ..

 

- اوك .. المرة الجاية هجبلك معايا الأفلام اللي عملتها ..

 

- تمام ..

 

- جبت القصة معاك .. لحسن موصلتنيش خالص ..

 

- اتفضل ..

 

بعد الكلام القصير عن الشغل ده ، أو اللي مفترض يكون بإذن الله .. اتكلمنا أنا و ( تامر ) عادي في حاجات ثانية خالص .. لاحظت إنه متضايق شوية .. وسألته طبعاً .. وقالي إنه متضايق جداً للي بيحصل في لبنان – متنسوش إن الفترة دي كانت الحرب شغالة بين ( لبنان ) و ( اسرائيل ) - لإن ليه أصدقاء هناك .. معرفتش أقله إيه ! .. ( حاجة تحزن ! ) ، جدتي كانت بتقولها ، وفعلاً دي أحسن حاجة تقدر تقولها دلوقتي :

 

- حاجة تحزن ! ..

 

- فعلاً ! ..

 

صمت ! ..

 

- الغريب إني لما شفتك يا ( تامر ) مصدقتش إنك خريج صحافة !! .. يعني شكلك كويس ، ولبق في كلامك .. كنت ممكن تطلع مذيع .. هو انت ليه مدخلتش قسم ( إذاعة وتليفزيون ) بدل ( صحافة ) ؟ ..

 

- دخلت Interview إذاعة بس مقبلتش .. ده كان بسبب المجموع .. فإضطريت إني أدخل صحافة ..

 

- انت دفعة كام ؟ ..

 

- 1993 ..

 

- ياه ! .. انت قبل مني بكثير .. عارف ( د / أشرف صالح ) ؟ ..

 

- آه طبعاً ده كان مُعيد على أيامنا ..

 

- يا راجل ! .. ده كان رئيس القسم لفترة .. طب تعرف …………..

 

قعدنا فترة نتكلم على الكلية .. ذكريات .. ورا ذكريات .. بعدها قمنا .. اتمشينا شوية .. أنا كنت فاكر إن ( تامر ) ساكن في ( مصر الجديدة ) ..

 

- إشمعنى ( مصر الجديدة ) يعني ؟! ..

 

- يعني شكلك بيقول كده ! ..

 

إجابة تضحك طبعاً ! .. ده عامل زي ( شيرلوك هولمز ) اللي يعرف كل حاجة عنك ، من خلال لمسة إيديك !! .. على العموم مش مهم ..

 

- أمال انت ساكن فين يا ( تامر ) ؟ ..

 

- ( وسط البلد ) ! ..

 

يا بختك ! .. أنا طبعاً هخبط ييجي ساعة كمان عشان أرجع بيتنا .. المشكلة إن مفيش حد بقابله إلا ويقلي :

 

- انت ساكن فين يا ( محمد ) ؟ ..

 

- ( حلوان ) ! ..

 

- ياه دي بعيدة أوي ! ..

 

عااااااااااا ! .. كإني مش عارف إنها بعييييييييييييييييدة ! .. على العموم الواحد خلاص إتعود .. يعني لو سكنوني بعد كده في ( وسط البلد ) – زي ( تامر ) – ومفيش 5 دقائق مثلاً ووصلت لبيتنا ، هحس بفراغ فظيييييييييييع ! .. فين زحمة المترو ؟! .. وفين الخناقات اللي واحد إتعود عليها خلاص ( بين الراكب والسواق \ بين واحدة وواحد ، وده لكذا سبب ، من أشهرهم المعاكسات ! ) .. حتى لو الواحد ساب المترو وراح الميكروباص .. فين خناقات الميكروباظ – بلغة السواقين – عشان ربع جنيه ؟! .. ياه ! .. بجد حاجة لو الواحد سابها يحس بفراغ فظييييييييييييع ! ..

 

ملحوظة تبع الملحوظة اللي فوق : يا بختك برضه يا تامر .. إهئ ! .. سنيف ! ..

 

( تامر ) وصل بيتهم – وقطع الخواطر دي كالعادة ! - وسابني .. قعدت بعدها أتمشى شوية ، وفي سؤال محيرني الصراحة .. ( يا ترى أركب مترو ولا ميكروباص عشان أرجع بيتنا ) ؟؟ ..

 

* * *

 

مر أسبوع بعد آخر مرة قابلت فيها ( تامر ) .. ومتصلش بيا طول المدة دي .. مش عارف ليه ( الزهايمر ) مكنش رحيم بيا المرا دي ، وخلاني أنسى الموضوع .. وقعد ( شيطاني ) يوسوسلي بصورة شنيعة :

 

- جايز القصة معجبتوش ، وعشان كده طنشك ..

 

- أممكن ! .. ( نقلاً عن مسرحية ” عفروتو ” ! ) ..

 

أسبوع بحاله و ( تامر ) متصلش .. طيب حتى لو القصة معجبتوش يقلي .. يووووووه .. ( الشيطان ) مش عاتقني :

 

- يا سيدي ! .. تفتكر واحد زيك يعجبه أصلاً .. ده بقى حالك .. يبقى إيش حال قصتك يا عمونا ..

 

- أممكن ! .. ( نقلاً عن مسرحية ” عفروتو ” ! .. مش عارف أي مشهد ؟! .. يبقى راجع المسرحية عشان تعرف ! ) ..

 

حاولت الفترة دي أشغل نفسي بأي حاجة .. عاهدت نفسي إني مش هتصل بتامر .. يعني مش عايز أحرجه ، والأهم إني مش عايز أحرج نفسي .. قعدت مع والدتي نتكلم في أي حاجة .. طبعاً مسائل عوائلية إنتم ملكمش دعوة بيها .. عايزين تعرفوا دي كمان ؟! .. يعني هيكون إيه يا جدعان غير مشاكل والدي واخواته والميراث ، ومين خد إيه ، ومين قرص مين ؟!! ، وابن العم اللي جاي من عند ابن خالتي اللي مش عارف كان بيحلب البقرة أيام ما كان صغير .. مشاكل ملهاش أول من آخر .. لاحظت إن معظم الأبهات – جمع ( أب ) ! - اللي من جيل الستينات أو السبعينات أو حتى الثمانينات مشاكلهم بتنحصر في الموضوع ده ، أو موضوعات ثانية مش هخوت دماغكم بيها ..الأبهات ميعرفوش قد إيه المشاكل دي مبتأثرش على علاقته بأقرايبه وبس .. لا .. دي بتأثر كمان على علاقة ولاده بيهم وبولادهم كمان ..

 

( يعملوها الكبار ويقعوا فيها الصغار ) .. هو مين العبقري اللي صاغ كل البطيخ ده في العبارة اللي فاتت ؟؟ ..

 

طبعاً والدتي بتتأثر بالمشاكل دي .. حاجة غير طبيعية في حياة ولادها أكيد بتأثر عليها .. حبيت أقلها سيبينا من ده كله ، وفعلاً عرفت أخليها – بذكائي – تتنقل لموضوع ثاني خالص .. بحب أوي أقعد أسمع حكايات والدتي ، وهي صغيرة .. أولاً والدتي – بشهادة أصحابي كمان – من النوع العسول جداً .. تحب تتكلم معاها .. وجدتي التركية – اللي هي والدة والدتي - برضه كانت بتقعد تعمل معانا كده .. تعرفوا أنا عمري ما قلت في حياتي لجدتي ( ستو ) أو لجدي ( سيدي ) .. دائماً بنقلهم ( مُوما \ جدتي ) و ( بُوبا \ جدي ) .. والدتي واخواتها – خلاني وخالاتي - بيقللهم كده ، وإحنا – أحفادهم - بنقلهم كده برضه !! ..

 

أفتكر في مرة سألت والدتي مين فعلاً اللي خلانا نقول ( بُوبا ) و ( مُوما ) ؟؟ .. قالتلي إنها متعرفش .. بس الأساس في الموضوع – زي ما توقعت – جدتي .. مش تركية بقى ؟! .. كنت بضحك جداً من الحكايات اللي بتقلهالي والدتي عن طفولتها .. قالتلي إنها لما كانت صغيرة وبتعمل حاجة غلط ، فجأة تلاقي جدتي - تركية العرق ، مصرية النشأة - قلبت .. وتقعد تقول كلام غريب كده بالتركي .. الظاهر بتقول حاجة كده مش ولا بُد ! .. قعدنا – أنا ووالدتي – نحكي في الذكريات اللي من النوع ده .. طبعاً الأمر ميخلاش من توتر في العلاقات بين خلاني وخالاتي ووالدتي طبعاً معاهم .. زيهم زي والدي وعمامي وعماتي .. لكن الأكيد في عيلة والدتي إنهم بيرجعوا اخوات ثاني .. وصافي يا لبن ، حليب يا إنجوي .. ده طبعاً عكس والدي وعمامي وعماتي تماماً ..

 

الزعل بيسبب شروخ في أي علاقة ، مهما كان نوعها .. أنا عارف كده كويس .. وأنا ذات نفسي لما بزعل من حد مبعرفش – ومبقدرش - أسامح بسهولة .. أنا عارف إن فيكم واحد هيقلي :

 

- دي حاجة مش كويسة ..

 

لكن أعمل إيه في نفسي ؟! .. دي طبيعتي .. بحاول – على قد ما أقدر – إني أقلل الموضوع ده .. وبقعد أفكر في كلام والدتي :

 

- حتى لو زعلت من حد ، متقاطعهوش إلا لو ملقتش قدامك غير الحل ده ، لكن حاول على قد ما تقدر متعملش كده ، حتى لو وصل الموضوع ل ( صباح الخير يا جاري .. انت في حالك وأنا في حالي ) ، بس اسمك مقاطعتش حد ! ..

 

الزعل شئ مش كويس .. بس الأوحش الشرخ اللي بيحصل في علاقتك مع حد .. يمكن علاقتك ترجع بيه زي الأول .. لكن هيفضل الشرخ ده موجود في علاقتكم .. وفي أول خناقة هتتذكر الشرخ اللي فات واللي خدش الحاجة الجميلة اللي كانت بينكم ..

 

أنا مش عارف ليه حاسس بإكتئاب توغل - زي مبيد الحشرات ( ريد ) - في الحلقة دي .. بس كل حاجة بتجيب اللي وراها زي ما إنتم عارفين .. المهم .. سيبونا من الكلام ده كله ونرجع لمرجوعنا .. يوم الأربعاء .. طبعاً كده فات أكثر من 5 يوم – على رأي واحدة زميلتي ، مثقفة جداً بالمناسبة ! – بعد أول – وآخر لحد دلوقتي - مرة قابلت فيها ( تامر ) .. أتصل بيه ولا لا ؟؟ .. طيب هتصل بيه ..

 

تررررررررررررررررررررررررررن ( وماله لو ليلة توهنا بعيد وسيبنا كل الناس \ Call Tone !! ) ..

 

- آلو ..

 

- آلو .. سلام عليكم .. إزيك يا تامر ؟ ..

 

- تمام ..

 

- معاك محمد عادل ..

 

- آه .. إزيك يا محمد ؟ ..

 

- الحمد لله .. إيه يا باشا فينك ؟! ..

 

- أبداً والله يا محمد .. أصلي الفترة اللي فاتت بحضر نفسي للسفر ..

 

- سفر ! .. فين إن شاء الله ؟ ..

 

- بيروت ! ..

 

- $#@%^^^&

 

- أيوة عارف هتقول إيه ! ..

 

- الحقيقة أنا مش عارف أقول إيه ! .. على العموم تروح وتيجي بالسلامة إن شاء الله ..

 

- على فكرة أنا قريت القصة ..

 

- طب تمام ..

 

- وكنت عاوز أقلك رأيي ..

 

- أوك .. تحب نتقابل فين ؟ ..

 

- لا مش هينفع .. أصلي مسافر بكرة ..

 

- ^$%#%$##$##$ ..

 

- هقلك على حاجة أنا هكلمك بكرة الصبح .. أوك ؟ ..

 

- تمام .. يلا السلام عليكم ..

 

- مع السلامة ..

 

وقفلت الموبيل وأنا شاكك إن ( تامر ) ممكن يتصل بيا أصلاً .. وراح ( شيطاني ) - ونيسي في الحلقة دي - يكمل مهمته :

 

- شكله كده بيتهرب منك ..

 

- الله يحرقك بجاز وسخ ! ..

 

* * *