…واحد حب يعمل فيلم

 

تخيلوا واحد بينام الساعة 8 بليل زي الفراخ ، ممكن يصحى الساعة كام ؟ .. يعني أنا لو نمت بدري كده بصحى في حدود 5 أو 6 الصبح .. طبعاً أنا مليش عادة محددة في أوقات النوم دي .. ممكن أنام بدري جداً .. وممكن برضه أنام متأخر جداً .. أصل الصيف والحر وجو مصر اللي مبقاش جوها المعروف كل دي عوامل – من وجهة نظري – بتأثر على موضوع النوم والصحيان بدري ده ..

 

 

المهم سيبونا من ده كله .. أنا صحيت الساعة 6 الصبح .. قمت من النوم .. دخلت الحمام .. و … إحم ! .. خرجت من الحمام .. دخلت على أوضة الصالون اللي فيها الكمبيوتر .. المشكلة الأزلية إني مليش أوضة لوحدي .. ليا أوضة مشتركة مع إخواتي الصبيان .. وطبعاً أختي هي الوحيدة اللي ليها أوضة لوحدها .. فعلاً البنات رزقهم في رجليهم ! .. لكن مش مشكلة .. عارفين ليه ؟ .. الساعة 6 الصبح الناس – والبيت وده الأهم – بياكلوا رز مع الملائكة دلوقتي .. بحس لما بقوم من النوم في الوقت ده بالنشاط .. الخصوصية .. بس الأهم من ده كله إني هعرف أقعد على الكمبيوتر براحتي بعيداً عن دوشة البيت .. الحقيقة البيت مبيخلاش .. ومرة قلتلهم – بالحرف – بجد بحس إنكم لما بتسيبوا البيت بالإنتعاش ، لإن الكرنفال اليومي بيكون ( فينيتو ) .. لو إنتم – بكلم إخواتي الصبيان – سيبتوا البيت ، فيه أختي المُزعجة .. لو أختي وإنتم سيبتوا البيت ، فيه والدتي اللي مبتسبنيش لحالي .. ولو كلكم سيبتوا البيت ، ما عدا السيد الوالد ، لااا ! ، دي بقى حكاية !! ، أصلي نسيت أقولكم إن مكتب والدي في الصالون اللي فيه – زي ما قلت قبل كده – الكمبيوتر ، وطبعاً زي كل أب بيحترم نفسه ، يشوف إبنه قاعد قدام الكمبيوتر ، وهو بيشتغل ، إزااااااااااااي !! ..

 

- قوم سيبني أشتغل ..

 

- حاااااااااااضر يا بابا .. عااااااااا .. اهئ اهئ ..

 

 

مأساة ! .. فمفيش غير حلين عشان أعرف أحس بالخصوصية .. يإما كل اللي في البيت يسيبوا البيت ويقعدوا في حتة ثانية .. ودي من رابع المستحيلات .. يإما أقوم بدري وهما نايمين .. وده الحل الأقرب للتطبيق .. بدخل المطبخ .. بحضر كباية شاي .. وبدخل بالكباية للبالكونة .. بقعد أتأمل في كل حاجة .. وأفكر .. ياه الكون فعلاً بيبقى جميل .. هدوء .. وجو مصر بيبقى في الوقت ده غير جوها الظهر أو العصر أو حتى بليل .. كل حاجة في الوقت ده صعب تتوصف .. هي تتعاش أكثر .. صدقوني ! ..

 

 

طبعاً ساعتين مروا عليا ، وأنا مش واخد بالي خالص .. نسيت نفسي .. ونسيت إني أشرب كباية الشاي لما تبرد زي كل مرة .. ونسيت الكمبيوتر اللي المفروض ألحق أقعد عليه في هدوء .. أخلص شغلي .. أو أتفرج على فيلم .. أو أعمل أي حاجة عليه .. لكن اللي فوقني من كل ده .. خبطة والدي على باب البالكونة بينبهني إني أشوف مين اللي بيخبط على الباب .. فتحت .. لقيت ( عم توفيق ) بواب العمارة .. الراجل ده الحقيقة يبرطم بسبب أو من غير سبب .. تسأله يعملك حاجة .. يطلع روحك في مناقشتها ، وفي الآخر بيعملها !! ..

 

- خذ يا ( عم توفيق ) هات ب 75 قرش فول و 50 قرش طعمية ..

 

- مهو ..

 

هيبرطم ( عم توفيق ) زي عوايده .. يظهر والدي في اللحظة دي ..

 

- في حاجة يا ( توفيق ) ؟! ..

 

- لا مفيش !! ..

 

ويمشي ( عم توفيق ) ، ويديني الجرنال .. بقعد أضحك بيني وبين نفسي .. مفيش فائدة ! .. بمسك ( الأهرام ) .. آه النهاردة الأربعاء .. يعني يوم صفحة السينما ..

 

 

الحقيقة صفحة السينما يوم الأربعاء هي صفحة إعلانات عن الأفلام الجديدة ، ويمكن تلاقي حبة مواضيع كويسين ممكن تقراهم ، بس ده كله فين وفين بقى ! .. مشكلة صفحات السينما عندنا في مصر إنها بتتعامل مع السينما على أنها وسيلة ترفيهية ، وآه لو يعرفوا الفنون أهميتها قد ايه عند الشعوب .. حتى في الكلية – مهو أنا نسيت أقولكم إني بدرس صحافة – بيتعاملوا مع الفنون على إنها ( كماليات ) ، وملهاش لزمة !! .. حاولت في مرة أطلع بمشروع التخرج بتاعي مجلة سينمائية .. يا بوياااااااااااااا على اللي حصل !! .. رئيسة القسم اللي متتسماش .. قعدت تقول :

 

- لا لا لا ..

 

- طب حضرتك عايزة إيه يا ( حاجة ) ؟!! ..

 

( حاجة ) دي طبعاً مقولتهاش !! ..

 

- أنا عايزة مجلة عن البيئة ..

 

- دي هتبقى ( بيئة ) فعلاً !! ..

 

 

على كل حال أنا بحب أتابع السينما ، وأقرأ المقالات .. أهي ( ثقافة ) على الماشي برضه .. وأنا بتابع صفحة سينما الأهرام بتاعت يوم الأربعاء استوقفني عنوان ((( افتتاح حزين لمهرجان السينما العربية بباريس ))) .. ملخص الموضوع إن أحداث لبنان الأخيرة خيمت على مهرجان سينما العالم العربي بباريس ، وإن في حضور مصري قوي السنة دي سواء على مستوى الأفلام الروائية ( عمارة يعقوبيان \ حليم ) ، أو على مستوى الأفلام القصيرة ( الجنيه الخامس لأحمد خالد \ البنات دول لتهاني راشد \ بيت من لحم لرامي عبد الجبار \ يوم الإثنين لتامر السعيد \ …… ) .. إستنى هنا ! .. لاحظت في وسط الكلام المكتوب إن فيلم ( يوم الإثنين ) – فيلم مصري قصير – لمخرجه ( تامر السعيد ) إنتاج شركة ( Hot Spot Films ) ، والحقيقة أنا أول مرة أسمع عن شركة الإنتاج دي ، وحيث إني من المهتمين بالمجال السينمائي ، فحبيت أبحث عن إسم الشركة .. أووف ! .. ال Connection بطئ فحت !! .. تلاقي ( حد إبن حلال ) بيحمل حاجة كبيرة وساحب السرعة .. طيب أقوم شوية كده .. أكل أي حاجة .. وبالمرة أسيب ال Internet Explorer يحاول الدخول على Google في وسط زحمة السرعة دي ..

 

 

أفطر إيه ؟!! .. أفطر إيه ؟!! .. آه ! .. مانجة ! .. أهو تغيير .. الحقيقة أنا بحب الصيف – كنا صيف وقتها ! – عشان المانجة بالذات .. تخيلوا معايا فاكهة زي دي بتعمل إيه في البني آدم .. بتكلم بجد .. أنا في مرة كنت متضايق جداً ، ولما أكلت المانجة ، حسيت إني ( مروق ) بعدها .. عشان كده بسمي المانجة ( الفاكهة المرحة ) .. طيب أرجع أشوف الصفحة فتحت على جوجل ولا لسه .. أهو الجوجل قدامي ، فاتحلي دراعته .. طيب والنبي يا سي جوجل إعملي Search على ( هوت سبوت فيلمز ) .. همم !! .. باكل مانجة .. وأنا عارف إن والدي هيطلع يزعق ، عشان باكل مانجة قدام الجهاز .. طيب نخلص بسرعة بقى .. آه .. إيه ده ؟!! .. ده في كذا موقع عن ( هوت سبوت فيلمز ) ، بس كل ما أدخل على واحد منهم يجبلي الصفحة بيضااااااا ، والعبارة الخالدة ( The Page Cannot Be Displayed ) !!! ، أنا كل اللي عرفته إن الشركة دي في الإمارات ، وموقعها مبيتفتحش .. هممم !! .. طب ندخل على ( CinemaEast Film Festival ) جائز نلاقي فيها حاجة .. هنا بقى لقيت الموقع عن أفلام ( مهرجان سينما العالم العربي بباريس ) ، ومفيش حاجة طبعاً عن ( هوت سبوت فيلمز ) !! .. إيه اليوم الرائع ده !! ..

 

- أنا مش قلت محدش ياكل في الصالون ..

 

- أصل يا بابا ……..

 

- مفيش أصل ، قوم دلوقتي ، عايز أشتغل ..

 

- طيب هشوف حاجة 5 دقائق كده عقبال ما تصلي الفجر ..

 

صمت ! ..

 

- ماشي ، 5 دقائق مش أكثر من كده ..

 

 

طيب بسرعة بقى .. مفيش حاجة عن ( هوت سبوت فيلمز ) أقفل الصفحة و … لحظة ! .. إيه ده ؟!! .. دي صفحة كاملة عن المخرج ( تامر السعيد ) صاحب الفيلم القصير ( يوم الإثنين ) ، والصفحة بتقول :

 

 

((( تامر السعيد وُلد في القاهرة عام 1972 ، ودرس الصحافة في كلية الإعلام بجامعة القاهرة ، كما درس في المعهد العالي للسينما ، كما عمل كمساعد مخرج بعد ذلك في عدد من الأفلام ، وأخرج عدد من الأفلام القصيرة والوثائقية مثل ” يوم الإثنين ” ، ” شارلي ” ، ” 18 سبتمبر ” .. بلا بلا بلا ))) .. !!! ..

 

 

الحقيقة مش عارف جتلي الفكرة إزاي !! .. هي الفكرة جوايا من فترة مش قريبة ولا بعيدة .. بس هي جوايا .. نفسي بجد أحول قصة من قصصي لفيلم قصير ، وفي قصة – من وجهة نظري – تنفع لكده .. طبعاً ده حلم بيراود كل واحد مننا .. طيب ! .. إيه المانع لو أجرب ، وأبعت E-Mail لتامر ، وخصوصاً بقى إن إيميله موجود في نفس الصفحة الخاصة بالتعريف عنه ! .. وبعدين أديني جربت حظي ، عشان بعد كده أقول إني محرمتش نفسي من حاجة .. مع إني عارف النتيجة مُقدماً ، وهي إن ( تامر ) إستحالة يرد عليا !! .. في الوقت اللي كنت بفكر فيه ، لقيت إيديا بتفتح المسنجر !! .. إيديا بتاخد إيميل ( تامر ) Copy \ Paste !! .. إيديا بتكتب الرسالة اللي كان نصها !! :

 

 

((( السلام عليكم .. عزيزي تامر .. أتمنى أن تكون بخير .. قرأت عنك عزيزي من خلال بحثي عن شركة Hot Spot Films، ولم أجد موقع الشركة للأسف !! .. على أية حال أحببت أن أتقدم لك بقصة قمت بكتابتها ، ونُشرت في كتاب بالفعل ، والحمد لله أن القصة نالت إستحسان كل من قرأها ، وفكرت في أن القصة من الممكن أن تُحول إلى فيلم سينمائي قصير .. ما رأيك ؟ .. تحياتي محمد عادل عبد العظيم .. ملحوظة : بالمناسبة فرحت كثيراً عندما علمت أنك خريج كليتي ، وأنك كنت منضماً لنفس القسم صحافة .. ملحوظة تبع الملحوظة اللي على الجنب : ده إيميلي ……….. لو حبيت يكون بينا إتصال ))) ..

 

 

وراحت إيديا دايسة (send ) !! ..
ونكمل المرة الجاية ..